Í dag fór fram aðalmeðferð fyrir Héraðsdómi Reykjaness í máli föður sem ákærður er fyrir ofbeldi gegn dóttur sinni.
Ákæran er í tveimur liðum sem eru keimlíkir. Í þeim fyrri er maðurinn sakaður um að hafa í febrúar árið 2019 sett dóttur sína nauðuga út fyrir dyr heimilis þeirra skamma stund, seint að kvöldi, í náttförum einum fata…„og beitt hana þannig andlegum refsingum og sýnt henni vanvirðandi háttsemi,“ eins og segir í ákærunni.
Í hinum ákæruliðnum er manninum gefið að sök að hafa aðfaranótt sunnudagsins 3. mars 2019 tekið stúlkuna nauðuga af heimili þeirra, í náttfötum einum fata, og lokað hana í skamma stund úti í bílskúr. Telur ákæruvaldið það einnig flokkast undir andlegar refsingar og vanvirðandi háttsemi.
Aldur stúlkunnar kemur ekki fram í ákærunni.
Héraðssaksóknari telur þetta varða við 1. mgr. 99. gr. barnaverndarlaga. Þar segir: „Hver sem beitir barn andlegum eða líkamlegum refsingum, hótunum eða ógnunum eða sýnir af sér aðra vanvirðandi háttsemi gagnvart barni skal sæta sektum eða fangelsi allt að þremur árum.“
Í ákæru er þess krafist að maðurinn verði dæmdur til refsingar og greiðslu alls sakarkostnaðar.
Búast má við dómi í málinu eftir um fjórar vikur.
