Stefán Gunnar Ármannsson frá Akranesi hefur verið ákærður fyrir undanskot á virðisaukaskatti fyrir samtals 60 milljónir króna fyrir árin 2016, 2017 og 2018.

Snertir þetta rekstur fyrirtækis Stefáns, Hróar ehf, en það er búvélaverkstæði.

Stefán sat í 12 ár í sveitarstjórn Hvalfjarðarsveitar en í sveitarstjórnarkosningunum 2018 tók hann 14. sæti á lista framboðsins Áfram Hvalfjarðarsveit.

Stefán er framkvæmdastjóri og stjórnarmaður í félaginu Hróar. Er fyrirtækið sagt ekki hafa staðið skil á virðisaukaskattskýrslum og ekki staðið ríkissjóði skil á virðisaukaskatti sem félagið hafi átt að greiða á áðurnefndu tímabili.

Í annan stað er Stefán ákærður fyrir að hafa nýtt sér ávinning af brotum sem nema þessari upphæð, 60 milljónir króna.

Er þess krafist að Stefán verði dæmdur til refsingar og til greiðslu alls sakarkostnaðar.

Fyrirtaka verður í málinu við Héraðsdóm Vesturlands þann 8. október.