Jarðskjálfti af stærðinni 3,5 varð 1,9 kílómetrum norður af Grindavík klukkan hálf fimm í nótt. Um hálftíma síðar, eða rétt fyrir klukkan fimm í morgun, varð annar nokkur snarpur skjálfti og mældist hann 3,2. Upptök hans voru 1,5 kílómetrum norður af Grindavík.
Að sögn Veðurstofu Íslands hafa borist tilkynningar um að fólk hafi orðið vart við skjálftana enda urðu þeir mjög nálægt byggð. Nokkrir eftirskjálftar hafa mælst í kjölfarið og hafa þeir allir verið tiltölulega litlir, eða innan við 2 að stærð. Frá því á mánudag hafa mælst 76 skjálftar á Reykjanesskaga en þessir tveir seint í nótt eru þeir stærstu sem hafa mælst í vikunni.
Sem kunnugt er hefur óvenjuhratt landris mælst á svæðinu við fjallið Þorbjörn undanfarna daga en það er líkast til vísbending um kvikusöfnun á nokkurra kílómetra dýpi.