Mál Skúla Mogensen, fyrrverandi forstjóra WOW air, gegn Sveini Andra Sveinssyni lögmanni, er á dagskrá Héraðsdóms Reykjavíkur á föstudag. Í dagskrá dómstólsins er viðburðurinn skráður sem „annað“. Mun vera um að ræða formlegan fund málsaðila og dómara.
Hvorki Skúli né Sveinn Andri vildu tjá sig um málið við DV en Skúli er sagður byggja kröfu sína á því að Sveinn Andri hafi veitt rangar og villandi upplýsingar um mikilvæg mál tengd þrotabúinu, bæði í fjölmiðlum og á skiptafundum. Segir Skúli að með þessu hafi Sveinn Andri rýrt verulega það traust sem þarf að ríkja til hans sem skiptastjóra. Skúli vísar að sögn meðal annars til frétta Fréttablaðsins um kaup bandarísku kaupsýslukonunnar Ballarin á eignum þrotabúsins. Í tengslum við þær var haft eftir Sveini Andra að Ballarin hefði nú þegar greitt kaupverðið.
Skúli segir einnig að Sveinn Andri hafi einnig sýnt af sér vanrækslu við upplýsingagjöf um skiptakostnað og þóknanir og að hann hafi tekið sér þóknun úr þrotabúinu án þess að hafa heimild til þess.
