Bílasali hefur verið ákærður fyrir tvö atvik sem bæði varða meintar árásir hans á lögreglumenn.

Fyrra atvikið átti sér stað í mars í fyrra en þá er maðurinn sagður hafa tryllst um borð í vél Icelandair. DV greindi frá því atviki á sínum tíma en samkvæmt þeirri frétt brutust út átök um borð í vél á leið til Stokkhólms, fyrir flugtak.

Þurfti að leita aðstoðar lögreglu vegna manns sem var í annarlegu ástandi um borð og lét öllum illum látum. Olli þetta um 30 mínútna seinkun á fluginu en maðurinn var handtekinn og leiddur frá borði. Í ákæru gegn manninum er hann sakaður um að hafa slegið lögreglumann, við skyldustörf, hnefahöggi í andlitið í téðri flugvél.

Þá er maðurinn einnig sakaður um að hafa síðar í sama mánuði reynt að kýla annan lögreglumann, þá á bráðamóttöku Landspítalans í Fossvogi. Hann er enn fremur sakaður um að hafa hrækt á þriðja lögreglumanninn í lögreglubíl á leið frá Landspítalanum á lögreglustöðina við Hverfisgötu. Hrákinn lenti á vinstri vanga.