„Við erum náttúrlega mjög ánægð með viðbrögðin í útboðinu og hversu mikið safnaðist og hversu margar áskriftirnar voru, mikil umframeftirspurn þannig að við erum auðmjúk og stolt yfir þessum mikla stuðningi við Icelandair og hvernig þetta tókst allt saman til,“ segir Bogi Nils Bogason forstjóri Icelandair, í viðtali við RÚV í kvöld.
Hlutafjárútboð Icelandair fór fram í dag en með því lauk fjárhagslegri endurskipulagningu félagsins. Stefnt var að því að safna 20 milljörðum í nýju hlutafé. Yfir níu þúsund áskriftir bárust að fjárhæð rúmlega 37 milljarðar á genginu 1. Verða hins vegar seldir 23 milljarðar og stendur ekki til að auka hlutaféð umfram það þrátt fyrir þessa miklu eftirspurn.
Bjarni Benediktsson fjármálaráðherra segir niðurstöðu útboðsins jákvæða og að fólk viðist hafa trú á Icelandair. Ríkissjóður veitti Icelandair ábyrgð á lánalinu upp á 16,5 milljarða. Forsendur þeirrar ábyrgðar voru að hlutafjárútboðið tækist.