Kirkjuþing sendi frá sér yfirlýsingu í gær vegna auglýsingar Sunnudagaskólans sem sýndi Jesú með brjóst eða svonefndan trans Jesú. Þar segir að ætlunin hafi aldrei verið að særa fólk.
„Kirkjuþingi 2020 þykir afar miður að jesúmynd í auglýsingu um sunnudagaskóla kirkjunnar hafi sært fólk. Ætlunin var að undirstrika fjölbreytileikann en hvorki að særa fólk né ofbjóða“
Myndin var fjarlægð af Facebook-síðu kirkjunnar sem og heimasíðu hennar. Pétur G. Markan, samskiptastjóri Þjóðkirkjunnar sagði í samtali við Vísi í gær að það hafi verið gert vegna fjölda ljótra ummæla sem höfðu fallið í athugasemdum við myndina.
„Það voru komin ummæli þarna sem voru heldur svæsin og persónulega ljót. Það er ekki það sem við viljum,“ sagði Pétur í samtali við fréttastofu Vísis.
