Helgi Vilhjálmsson, ávallt kenndur við sælgætisgerð sína, Góu, hefur birt auglýsingar í dagblöðum í dag undir yfirskriftinni Höldum fólki í vinnu.
Í stuttu máli vill Helgi bjarga störfum með því að lækka mótframlag atvinnurekenda í lífeyrissjóði tímabundið, eins og segir í fréttatilkynningu um málið:
„Helgir bendir þar á hvernig hægt væri að bjarga fjölda starfa í atvinnulífinu með tímabundinni lækkun mótframlags atvinnurekenda í lífeyrissjóði. Þar bendir hann á um hversu háar tölur er að ræða og hve mótframlag atvinnurekenda í lífeyrissjóð hefur hækkað mikið á síðastliðnum árum, en í dag er mótframlagið 11,5% en var t.d. 8% árið 2016.
„Ef við við skoðum þetta nánar, þá myndi það bjarga yfir 6500 störfum ef mótframlagið yrði lækkað aftur í 8%. Þetta eru svo stórar tölur. Bara þessi lækkun myndi lækka launakostnað fyrirtækja um 39 milljarða á ári án þess að útborguð laun myndu lækka. Það skiptir okkur núna mestu máli að finna leiðir til að lækka kostnað án þess að fókið finni fyrir því. Atvinnuleysi er versti óvinur fólksins“, segir Helgi um auglýsingarnar sínar.“
Samstaða er lausnin, segir Helgi: „Núna eru fyrirtækin að berjast í bökkum og þá er ekki rétti tíminn til að rífast, heldur finna lausnir saman. Þannig komumst við upp úr ástandinu og getum horft saman til framtíðar.“
