Karlmaður sem synjað var um meðferðina brasilískt vax á snyrtistofu kærði stofuna til úrskurðarnefndar jafnréttismála. RÚV vakti athygli á málinu en í úrskurði nefndarinnar um málið segir:

„Kærð var ákvörðun snyrtistofu um að synja kæranda um svokallað brasilískt vax á þeirri forsendu að þjónustan væri ekki í boði fyrir karlmenn. Kærunefndin taldi að skilja bæri málatilbúnað kærða á þann veg að félagið væri með ákvörðun sinni að reyna að gæta velsæmis og koma í veg fyrir að blygðunarkennd starfsfólks yrði særð. Við þær aðstæður varð að mati kærunefndarinnar að ljá kærða þó nokkurt svigrúm til að meta hvort bjóða ætti karlmönnum svo viðkvæma þjónustu. Með hliðsjón af þeim sjónarmiðum sem kærði tefldi fram taldi kærunefndin að kærði hefði ekki farið út fyrir það svigrúm með umræddri synjun. Taldist kærði þannig hafa sýnt fram á það að réttlæta mætti ólíka meðferð félagsins á kvenkyns viðskiptavinum og karlkyns viðskiptavinum á málefnalegan hátt með lögmætu markmiði og aðferðirnar til að ná því markmiði væru viðeigandi og nauðsynlegar.“

Brasilískt vax felur í sér brottnám hára af líkamanum, meðal annars af kynfærum. Kærandinn segir að honum hafi verið neitað um að bóka tíma í þessa meðferð á þeirri forsendu að stofan veitti þessa þjónustu ekki til karlmanna eða transfólks. Kærandinn byggir á ákvæðum jafnréttislaga sem banna mismunun á grundvelli kyns.

Kærnefndin telur hins vegar rök snyrtistofunnar, sem neitaði manninum um þjónustuna til að gæta velsæmis, séu gild. Aðeins vinna konur á stofunni en meðferðin krefst nektar og meðhöndlun kynfæra. Var niðurstaða kærunefndarinnar sú að snyrtistofan hefði ekki brotið jafnréttislög með því að neita manninum um þjónustuna.

Sjá úrskurð kærunefndar jafnréttismála