Þórólfur Guðnason sóttvarnalæknir hefur lagt til við heilbrigðisráðherra að slakað verði á samkomubanni þegar þann 7. september en ekki 10. september eins og áður var áformað.

Tilslakanirnar fela í sér að hámarksfjöldi á samkomu fer úr 100 upp í 200. Líkamsræktarstöðvar og sundstaðir megi hafa 75% af leyfilegum gestafjölda í stað 50% eins og er nú og að sviðslistasýningar verði leyfðar með 200 manna áhorfendafjölda hið mesta.

Tveggja metra nálægðarreglan mun víkja fyrir eins metra nálægðarreglu og bendir Þórólfur á að eins metra fjarlægð minnki smithættu fimmfalt.

Fjögur innanlandssmit greindust í gær, en sólarhringana tvo á undan greindust fimm hvorn dag.

Þrír greindust á landamærum og er niðurstöðu mótefnamælingar beðið. Þórólfur sagði að fjöldi smita sem greinast á landamærum fari vaxandi þrátt fyrir að færri komi til landsins. Gæti það endurspeglað vöxt veirunnar erlendis en einnig að fólk frá sýktari svæðum sé að koma til landsins.

Hvað innanlandssmit varðar hafa 60% þeirra sem greinst hafa frá 15. júní verið í sóttkví. Ekki hafa ný afbrigði veirunnar komið fram undanfarið.