Því miður er það að gerast að fólk sem er með einkenni COVID-19 fer á mannamót og greinist eftir það með veiruna. Þetta kom fram í máli Ölmu Möller landlæknis á upplýsingafundi dagsins hjá Almannavörnum. Alma brýnir fyrir fólki sem finnur fyrir einkennum að halda sig heima, fara í sýnatöku og halda sig til hlé.
Helstu einkenni veirunnar undanfarið eru hálssærindi, vöðvaverkir og beinverkir. Minna algeng einkenni eru breyting á bragð- og lyktarskyni, ógleði, uppköst og niðurgangur.
Kamilla Sigríður Jósefsdóttir, staðgengill sóttvarnalæknis, fór yfir tölur helgarinnar. 117 eru í einangrun og hafa 30 bæst við frá síðasta upplýsingafundi sem var á fimmtudaginn. Nítján innanlandssmit greindust um helgina og sem betur fer voru 16 í sóttkví sem er betra hlutfall en undanfarið. Ellefu landamærasmit greindust, tvö eru staðfest virk, einn var með mótefni (þ.e. gamalt smit) en aðrir bíða greiningar.
Um eitt þúsund manns eru nú í sóttkví.
Maður sem lengi undanfarið hefur legið á sjúkrahúsi með sjúkdóminn hefur verið útskrifaður. Hins vegar var annar maður lagður inn á Landspítalann um helgina með veiruna.
