Borgun varar við yfirstandandi tilraunum til fjársvika sem sett eru fram í nafni borgunar. Þetta kemur fram í tilkynningu frá Borgun.

„Um er að ræða svikatilraunir með tölvupósti og SMS–skilaboðum sem Íslendingum hafa verið send og látin eru líta út fyrir að komi frá Borgun. „

Í skilaboðunum er fólki sagt að það hafi fyrir mistök tvígreitt kortareikning. Eitthvað flestir yrðu heldur ósáttir með. Eins er því haldið fram að korti þeirra hafi verið lokað og þurfi að heimsækja sérstaka vefsíðu, gefa þar upp kortaupplýsingar sínar, til að fá kortið opnað að nýju og tvígreiðsluna endurgreidda.

„Þetta má fólk alls ekki gera því það eru þessar kortaupplýsingar sem fjársvikararnir ásælast og þeir hafa lagt talsvert á sig til að kasta ryki í augu þeirra sem heimsækja vefsíðuna en hún er hönnuð í útliti Borgunar og er með stórri yfirlitsmynd af Reykjavík.“

Borgun bendir á að fyrirtækið biður aldrei um kortaupplýsingar í tölvupósti, með skilaboðum eða símtali. Korthöfum er bent á að opna ekki þessa pósta eða skilaboð og smella ekki á neina hlekki sem fylgja með.

„Og gefa ekki undir neinu kringumstæðum upp kortaupplýsingar. Best er að eyða skilaboðunum strax.“ 

Hafi einhverjir brugðist við skilaboðunum er þeim bent á að hafa umsvifalaust samband við Borgun.

„Hafi fólk brugðist við skilaboðunum er mælt með því að hafa umsvifalaust samband við þjónustuver Borgunar í síma 560 1600 eða senda skilaboð á borgun@borgun.is.“

Lögreglu og netöryggissveit Póst- og fjarskiptastofnunar hefur verið gert viðvart um málið auk helstu þátttakenda í öryggissamstarfi fjármálastofnana.

„Þétt samstarf allra þessara aðila er höfuðatriði í baráttu gegn netglæpum af þessu tagi.“