„Fólk er ekki meira smitandi áður,“ segir Kári Stefánsson forstjóri Íslenskra Erfðagreiningar. Hann segir það ekki rétt að fólk sé að greinast með meira magn veiru nú en áður, það sé einfaldlega verið að ná fyrr til smitaðra einstaklinga en áður sem útskýri aukið magn veirunnar í þeim er greinast.

Segir Kári það ekki rétta túlkun að veiran hafi breyst eða þróast með einhverjum hætti á þann veg að hún sé í meira magni í smituðum einstakling en áður. Slíkt kom fram í fjölmiðlum í gær eftir upplýsingafund Almannavarna en Kári segir slíka túlkun vera á misskilningi byggða.

Fólk er því ekki meira smitandi en áður en það smitar mest þegar það er með mikið magn veiru í sér. „Fólk er með mesta magn veiru nokkrum dögum áður en það fær einkenni,“ segir hann og ítrekar mikilvægi þess að fólk geri sér grein fyrir því að það séu engin tengsl milli magn veiru og hversu veikt fólk verður. Þannig getur einstaklingur með lítil einkenni verið með mikið magn veirunnar og því verið bráðsmitandi.

Kári segir mikilvægt að bregðast hratt við og að fólk sé ekki að koma saman í hópum. „100 manns er alltof mikið. Fólk verður að axla ábyrgð,“ segir Kári og hvetur landsmenn til þess að vera ekki á þvælingi að óþörfu og forðast alla hópamyndun.