„Við lækkum hraðann þangað til að við erum búin að mæla viðnámið og erum viss um að kaflinn sé orðinn nógu góður. Það gerist með umferð og tíma,“ segir G. Pétur Matthíasson upplýsingafulltrúi Vegagerðarinnar um hámarkshraða á nýlögðu malbiki.

Nýlagt malbik hefur fengið mikla athygli og umfjöllun í sumar í kjölfar banaslyss á Kjalarnesi. Víða í höfuðborginni og á landsbyggðinni er nýlagt malbik. Í kjölfar banaslyssins var gerð reglugerð þar sem skylda er að lækka hámarkshraða niður í 50 km/klst og vara við hálu malbiki alls staðar þar sem nýlagt malbik er.

Ekki er vitað hversu lengi hámarkshraðinn verður takmarkaður. Hann segir þetta eiga við um allt nýlagt malbik. Ekkert er hægt að gera til að flýta fyrir því að malbikið verði klárt.