Skondið atvik átti sér stað á upplýsingafundinum vegna COVID-19 sem kláraðist rétt í þessu. Alma D. Möller, landlæknir, var að fara yfir sóttvarnaraðgerðir þegar hún sagði að fólk ætti reglulega að þvo sér um hendur í tuttugu mínútur

„Það þarf að þvo sér oft og reglulega um hendurnar með sápu í tuttugu mínútur og það þarf að hreinsa hendurnar með spritti þess á milli,“

Þegar að Alma hafði lokið máli sínu leiðrétti Víðir hana með brosi á vör.

„Ég veit að landlækni er mjög annt um handþvott, en ég geri ráð fyrir því að hún hafi ætlað að segja tuttugu sekúndur, en ekki tuttugu mínútur. Við getum verið viss um að þær verði mjög hreinar ef maður þvær þær í tuttugu mínútur.“

Alma þakkaði Víði fyrir að benda á þetta.

Erfitt að ná til yngra fólks

Fleira en þessi misskilningur kom fram á upplýsingafundinum. Til að mynda sagði Þórólfur Guðnason, sóttvarnarlæknir að ekki væri ástæða til að grípa til aðgerða á þessari stundu, þó værum við viðbúin frekari aðgerðum.

„Á þessari stundu sé ég ekki ástæðu til að grípa til harðari aðgerða en gripið var til fyrir tæpri viku síðan, en við erum bara í startholunum ef ástandið versnar eða breytist á einhvern hátt þá þurfum við að endurskoða það sem við höfum verið að gera. Það er einnig ánægjulegt að við erum ekki að sjá alvarleg veikindi enn komið er, en þau geta komið síðar og þurfum bara að vera vel á varðbergi.“

Þá ræddi Alma um yngra fólk sem virðist vera að smitast hvað mest. Hún sagði að stundum gengi það erfiðlega að ná til þess og þá biðlaði hún til foreldra að fara yfir málin með ungu fólki.

„Við sjáum núna að það er yngra fólk sem er að smitast og við höldum að við séum ekki að ná nógu vel til þeirra með upplýsingar. Meðal annars vegna allar þessar endurtekningar. Almannavarnir eru að skerpa á upplýsingagjöf til þeirra en við biðjum ykkur áfram að hjálpa okkur við að koma þeim til skila. Til dæmis væri gott ef foreldrar fara yfir smitvarnir með sínu unga fólki.“