Óvenjulega rólegt er í Vestmannaeyjum þessa verslunarmannahelgi enda var Þjóðhátíð aflýst eins og landsmenn vita. Þrátt fyrir það var kveikt í brennu í gærkvöld. Lokað var inn í Herjólfsdal en fólk fylgdist með brennunni úr fjarlægð, sem og með flugeldasýningu. Lögreglan í Vestmannaeyjum fer yfir þetta og verkefni sín í nótt í tilkynningu á Facebook-síðu sinni:

„Rólegt var hjá lögreglunni í Vestmannaeyjum sl. nótt og engin alvarleg mál komu upp. Kveikt var í brennu á Fjósakletti kl. 23:00 í gærkveldi. Töluverður fjöldi áhorfanda var að fylgjast með þegar kveikt var í brennunni. Búið var að loka fyrir aðkomu að Herjólfsdal og var gæsla á vegum brennuleyfishafa og lögreglu. Fólk safnaðist saman við Hamarsveg og á golfvellinum til að horfa á brennuna og flugeldasýninguna.

Þrjú fíknefnamál komu upp frá því í gær og í nótt. Öll málin voru svokölluð neyslumál. Efnið sem haldlagt var er kannabis.
Tvisvar þurfti lögreglan að hafa tal af fólki þar sem kvartað var yfir hávaða þar sem gleðskapur var í heimahúsi og truflaði þar nágranna sína.