Héraðssaksóknari hefur birt ákæru gegn liðlega þrítugum pólskum manni sem á lögheimili í Reykjavík. Manninum er gefið að sök að hafa fyrir rétt rúmu ári síðan hótað lögreglumönnum lífláti og sparkað í fótlegg lögreglumanns. Atvikið átti sér stað að Háaleitisbraut í fyrravor.

Þar sem ekki hefur tekist að ná í manninn hefur ákæran verið birt í Lögbirtingablaðinu. Í ákærunni segir:

„…fyrir brot gegn valdstjórninni, með því að hafa að kvöldi föstudagsins 31. maí 2019 að Háaleitisbraut 155 í Reykjavík, hótað lögreglumönnum nr. 1709 og H1312 lífláti, og stuttu síðar inni í lögreglubifreið fyrir utan húsnæðið sparkað í fótlegg lögreglumanns nr. H1312, en lögreglumennirnir voru við skyldustörf.
Telst þetta varða við 1. mgr. 106. gr. almennra hegningarlaga nr. 19/1940.
Þess er krafist að ákærði verði dæmdur til refsingar og greiðslu alls sakarkostnaðar.“

Maðurinn er kvaddur til að koma fyrir dóm, hlýða á ákæru, halda uppi vörnum og sæta dómi. Mæti hann ekki má hann búast við því að fjarvist hans verði metin til jafns við það að hann viðurkenni að hafa framið brotið sem hann er ákærður fyrir og dómur verði lagður á málið að honum fjarstöddum.

Undir ákæruna ritar Kolbrún Benediktsdóttir varahéraðssaksóknari.