„Persónulega sé ég ekki mun á því að vera fullur á bar klukkan ellefu eða klukkan tólf,“ segir Jón Bjarni Steinsson, eigandi Dillon, en hann er ekki sáttur við þá ákvörðun Almannavarna að fresta lengingu á afgreiðslutíma skemmtistaða um óákveðinn tíma. Vínveitingastaðir mega bara hafa opið til ellefu á kvöldin. Jón Bjarni segir í spjalli við DV:

„Held ég geti sagt að barir og vínveitingastaðir sem eru ekki að selja mat þoli það ekki mikið lengur að reyna halda sér í rekstri með 30-40% af fyrri veltu. Það myndi breyta mjög miklu þó ekki væri nema bara hafa opið til 12. Ég persónulega sé ekki mikinn mun á því að vera fullur inni á bar kl. 11 eða vera fullur inni á bar kl. 12.“

Jón Bjarni ætlar þó að halda sínu striki með Dillon í sumar og blæs þar til tónleikaveislu. Verða tónleikar á staðnum allar helgar í júlí og inn í ágúst, fram að Menningarnótt.

„Það er ekki í boði annað en að reyna,“ segir Jón Bjarni.

Fram kemur í frétt í Morgunblaðinu í dag að rekstur B5 og fleiri skemmtistaða er í mikilli hættu vegna takmarkaðs afgreiðslutíma. Eigendur þessara staða gagnrýna mjög að ekki sé komið til móts við þá varðandi það tekjufall sem staðir þeirra verða fyrir vegna þessara hamla.