Katrín Jakobsdóttir, forsætisráðherra fjallaði um kvenréttindadaginn í pistli sem birtist á Fréttablaðinu í dag. Hún leggur mikla áherslu á kynbundið ofbeldi í skrifum sínum og bendir á að COVID-19 faraldurinn hafi eflaust haft slæm áhrif á jafnréttismál.
„Á kvenréttindadeginum fögnum við kosningarétti kvenna og þátttöku kvenna í stjórnmálastarfi. Þær breytingar sem konur börðust fyrir og þykja nú sjálfsagðar, eins og leikskólakerfið og fæðingarorlof, kostuðu mikla vinnu og fórnir. Þær konur sem komu Kvennaathvarfinu og Stígamótum á fót unnu einnig þrekvirki og hafa unnið ómetanlegt starf áratugum saman, þegar kemur að því að styðja við brotaþola kynbundins ofbeldis.
Við sjáum afturför í jafnréttismálum víða um heim vegna COVID-19 faraldursins. Heimilisofbeldi hefur aukist um allan heim og hafa Sameinuðu þjóðirnar bent á að heimilisofbeldi færist í vöxt þegar konur einangrast með ofbeldisfullum maka og eiga erfitt með að sækja í þau úrræði sem annars gætu gagnast þeim, til að komast undan ofbeldismanninum. Hér á landi eru vísbendingar um hið sama og þá hefur tilkynningum til barnaverndarnefnda einnig fjölgað.“
Katrín segir að kynbundið ofbeldi sé enn þann dag í dag falið mein, þrátt fyrir öfluga vitundarvakningu. Hún telur afar mikilvægt að fólk standi saman til að uppræta það.
„Kynbundið ofbeldi er enn þá falið mein í samfélaginu, þrátt fyrir vitundarvakningu síðustu ára. Það býr undir yfirborðinu og þrífst í þögninni. Hjálpsemi, samstaða og stuðningur við náungann hafa einkennt okkur sem samfélag í baráttunni við COVID-19 síðustu mánuði. Mikilvægt er að við stöndum líka saman í baráttunni gegn kynbundnu ofbeldi og tökum þátt í því að uppræta það.“
Að lokum heldur Katrín því fram að til þess að stöðva kynbundið ofbeldi þurfi aðgerðir. Í þeim efnum minnist hún á Þingsályktunartillaga um forvarnir fyrir börn og ungmenni sem samþykkt var á dögunum.
„Þingsályktunartillaga um forvarnir meðal barna og ungmenna gegn kynferðislegu og kynbundnu ofbeldi og áreitni, ásamt áætlun fyrir árin 2021 – 2025, var samþykkt á Alþingi í byrjun þessa mánaðar. Með þessari áætlun ætlum við gera tilraun til að uppræta kynbundið og kynferðislegt ofbeldi, með því að byggja inn í forvarnastefnuna mikilvægan skilning á eðli og afleiðingum ofbeldis.
Til þess að uppræta samfélagsmein eins og kynbundið ofbeldi þarf að ráðast í aðgerðir til að knýja fram nauðsynlegar breytingar. Og við eigum magnaðar fyrirmyndir í þeim efnum. Þökkum þeim baráttukonum sem tóku þennan slag fyrir okkur öll og til hamingju með daginn öll.“
