Af þeim 3.400 sumarstörfum sem ríkið skapaði fyrir stúdenta í ár hefur ekki tekist að ráða í 500. Stúdentaráð hefur að undanförnu kallað eftir frekari aðgerðum stjórnvalda og sagt að 3.400 störf dugi ekki til.

Fréttablaðið skýrir frá þessu. Haft er eftir Alejandrea Díaz, formanni Stúdentaráðs, að enn sé stór hópur stúdenta atvinnulaus. Í tilkynningu frá félagsmálaráðuneytinu segir að það hafi komið opinberum stofnunum og sveitarfélögum á óvart hversu margir námsmenn voru búnir að ráða sig í vinnu þrátt fyrir að hafa sótt um störf sem voru sköpuð í átakinu.

„Því er ljóst að staða námsmanna á vinnumarkaði er umtalsvert betri en forystufólk námsmanna hefur talið hingað til.“

Segir í tilkynningunni. Sveitarfélögin fengu heimild til að ráða í 1.700 störf en hafa ráðið í um 1.450. 1.510 námsmenn sóttu um þau 1.500 störf sem voru í boði hjá ríkisstofnunum. Félagsmálaráðuneytið segir ljóst að stór hluti umsækjendanna sé kominn með vinnu annars staðar og reiknar ekki með að geta ráðið í öll störfin.