Íbúar í Rimahverfi eru orðnir langþreyttir á meintum „hverfisperra“ sem hefur verið töluvert til umræðu í fjölmiðlum síðustu daga. Viðkomandi býr á jarðhæð í fjölbýlishúsi nálægt leikvelli. Hann hlaut dóm fyrir blyðgunarsemisbrot árið 2014. Foreldrar eru ósáttir við að maðurinn fái að ganga laus óáreittur þar sem ekki sé annað að sjá en hann haldi áfram að brjóta af sér. Nú eru íbúar í hverfinu að safna undirskriftum, sem á meðal annars að afhenda dómsmálaráðherra, þar sem aðgerða er krafist.

Í grein sem Ragnheiður Lára Guðrúnardóttir og Sigurður Hólm Gunnarsson, foreldrar í Rimahverfi, skrifuðu á Vísi.is í vikunni fjölluðu þau um manninn. Þar segja þau meðal annars að hann áreiti börnin í hverfinu kynferðislega dag eftir dag og hafi gert áratugum saman. Hann hangi í glugganum og frói sér yfir börnum sem eru að leik á leikvellinum framan við stofugluggann hans. Hann hafi margoft verið kærður, hafi hlotið einn dóm, allir viti af honum en ekkert sé gert í málinu.

Á Facebooksíðu íbúa í Grafarvogi er nú verið að safna undirskriftum þar sem tafarlausra aðgerða er krafist til verndar börnum í Rimahverfi gegn ítrekaðri kynferðislegri áreitni. Til stendur að afhenda dómsmálaráðherra, félagsmálaráðherra, barnaverndaryfirvöldum, Umboðsmanni barna og fleirum undirskriftirnar.

Texti undirskriftalistans er svohljóðandi:

„Erindi: 

Ósk um samráð og tafarlausar aðgerðir til að vernda börn í Rimahverfi í Grafarvogi gegn ítrekaðri kynferðislegri áreitni.

Við undirrituð óskum eftir samráði og aðgerðum við dómsmálaráðherra, barnamálaráðherra, Barnaverndarstofu, Barnavernd Reykjavíkur, Miðgarð, Reykjavíkurborg, umboðsmann barna og Íbúaráð Grafarvogs til að bregðast við langvarandi aðgerðarleysi er varðar öryggi barna í Rimahverfi í Grafarvoginum.

Í um fimmtán ár hafa tilkynningar borist af ósæmilegri hegðun íbúa hverfisins er varðar brot á blygðunarsemi barna skv. 209 gr. almennra hegningarlaga nr. 1940/19. Brotið hefur verið á fjölda barna með reglubundnu athæfi einstaklings sem hefur áður hlotið dóma vegna sama athæfis. Ekkert lát virðist vera á hegðun viðkomandi og óttumst við að hann haldi gjörðum sínum áfram verði ekki brugðist við með viðeigandi hætti. Umræddur íbúi býr í nokkurra metra nálægð við leikvöll og gönguleið barna í skóla.

Börnin okkar eiga rétt á því að alast upp í öruggu umhverfi. Í lögfestum Barnasáttmála Sameinuðu þjóðanna segir í 34 gr. að aðildarríki skuldbindi sig til að vernda börn fyrir hvers kyns kynferðislegri misnotkun í kynferðislegum tilgangi. Í núgildandi barnalögum nr. 76/2003 segir jafnframt í 1. grein að barn eigi rétt á að lifa, þroskast og njóta verndar, umönnunar og annarra réttinda í samræmi við aldur sinn og þroska og án mismununar af nokkru tagi. Óheimilt er að beita barn hvers kyns ofbeldi eða annarri vanvirðandi háttsemi.

Teljum við, undirrituð að vanbúnaður sé á öryggi barna okkar sem bregðast þurfi við strax. Því óskum við eftir viðbrögðum, samráði og aðgerðum að hálfu ofangreindra aðila.

Með ósk um skjót viðbrögð,“

Undir þetta hafa fjölmargir nú þegar skrifað. Stefnt er á að afhenda listann á mánudaginn.