Yfirvofandi uppsagnir á starfsfólki mötuneytis Seltjarnarnesbæjar gengu eftir á föstudag en þá fengu 13 manns uppsagnarbréf. Margir af þeim eru með langan starfsaldur, t.d. þekkir DV dæmi um konu með 18 ára starfsaldur í mötuneytinu.
Seltjarnarnesbær ákvað að bjóða út allan mötuneytismat á vegum bæjarins en þar kveður mest að mat fyrir nemendur í Mýrarhúsaskóla, Valhúsaskóla og Leikskóla Seltjarnarness. Einnig sér mötuneyti bæjarins kennurum og öðru starfsfólki skólanna fyrir mat, sem og öðru starfsfólki bæjarins.
Sá aðili sem hlaut verkefnið er fyrirtækið Skólamatur.
Ástæðurnar fyrir þessari ráðstöfun eru taldar vera tvíþættar, annars vegar nauðsyn á hagræðingu í rekstri bæjarfélagsins og hins vegar þörf fyrir meiri fjölbreytni. DV fjallaðí um málið í síðustu viku og ræddi við Sigrúnu Eddu Jónsdóttur, bæjarfulltrúa Sjálfstæðisflokksins, fyrsta varaforseta bæjarstjórnar og formann skólanefndar Seltjarnarness:
„Þetta snýst fyrst og fremst um að auka fjölbreytni í matnum og við gátum ekki uppfyllt óskir þar um í núverandi fyrirkomulagi. Til dæmis er fólk sem kýs að fá grænmetisrétti og það hefur ekki verið hægt hingað til. Þetta er bara eins og gert er á fjölmörgums stöðum, við kjósum að fá matinn aðsendan.“
