„Ef við tökum bara mat síðustu tvo mánuði. Það er 1,3 prósenta hækkun á mat og drykkjarvöru á milli apríl og mars og ef við tökum breytingu frá febrúar fram í apríl er breytingin 1,8 prósent,“ segir Hjalti Óskarsson, sérfræðingur hjá Hagstofu Íslands.
Verðlagseftirlit ASÍ hefur að undanförnu fengið tilkynningar um verðhækkanir hjá bæði matvöruverslunum, birgjum og framleiðendum og hafa ýmsar vörur hækkað allduglega. Fall krónunnar hefur vissulega haft áhrif en þó eru dæmi um að gengisfallið sé hreinlega notað sem skálkasjól fyrir verðhækkanir.
Þetta er síðasti hluti af þremur í úttekt helgarblaðs DV á nýlegum verðhækkunum og breytingum á markaði.
Hjalti segir stofnunina ekki hafa orðið vara við að almennar hækkanir næmu 10-20 prósentum, en dæmi er um slíkar hækkanir hjá verslunum á síðustu vikum.
Samkvæmt upplýsingum frá Hagstofunni geta umtalsverðar verðhækkanir á neysluvöru, eðlilega, haft áhrif á vísitölu neysluverðs. Hins vegar vegi þá þyngra almennar hækkanir en ekki hækkanir á einstaka vörum.
Hagstofan fær upplýsingar um verð ýmist frá söluaðilum, stundum koma upplýsingarnar af heimasíðum söluaðila og í öðrum tilvikum er falast eftir upplýsingum með símtölum frá Hagstofu.
Verðbólga var 2,2 prósent í apríl sem er undir verðbólgumarkmiðum Seðlabankans. Vísitala hækkaði um 0,48 prósent frá fyrri mánuði (apríl.)