Leit hófst aftur í morgun klukkan 7:30 að skipverjanum sem saknað er á Vopnafirði. Lögreglu barst tilkynning þann 18. maí um að skipverja væri saknað af fiskiskipi eftir að skipið kom til hafnar í Vopnafirði. Leit hefur staðið yfir síðan þá, með hléum þó, en engan árangur borið.

Björgunarsveitarmenn frá Björgunarsveitinni Vopna njóta í dag aðstoðar björgunarsveitarinnar Lífsbjargar í Snæfellsbæ. Sú sveit býr yfir leitartæki sem heitir Coastex og er leitarprammi með glugga til að skanna botn á grunnsævi. Leitarsvæði er frá Tangasporði að Sandvík auk þess sem leitað verður í sandfjörum á svæðinu.