Seðlabanka Íslands hefur verið falið það verkefni að annast framkvæmd á ábyrgð ríkissjóðs. Bankinn hefur undirritað samninga við Íslandsbanka, Landsbankann, Arion banka og Kviku banka um veitingu ábyrgða vegna svokallaðra brúarlána.

Lánin hafa nú verið í umræðu nni um nokkurn tíma, en margir hafa beðið þeirra með talsverðri eftirvæntingu.

Brúarlán eru viðbótarlán til fyrirtækja, en þau eru ætluð litlum og meðalstórum fyrirtækjum sem orðið hafa fyrir tímabundnum rekstrarvanda vegna heimsfaraldurs af völdum kórónuveiru, COVID-19. Þetta kemur fram í fréttatilkynningu frá Seðlabankanum.

Í tilkynningunni segir: „Ríkissjóður gengst í ábyrgð fyrir allt að 70% af fjárhæð lánanna sem fyrirtæki geta fengið að uppfylltum ákveðnum skilyrðum, m.a. að lántaki greiði ekki arð eða kaupi eigin hluti á meðan ríkisábyrgðar nýtur við. Heildarábyrgð ríkissjóðs í þessum efnum getur numið allt að 50 milljörðum króna.“

Ásgeir Jónsson seðlabankastjóri sagði mikilvægt að þessir samningar séu komnir í höfn og að þessi úrræði ættu að hjálpa þjóðarskútunni.

„Það er mikilvægt að við höfum náð þessum samningum í höfn um viðbótarlán. Nú hefur opnast nýr möguleiki fyrir aðþrengd fyrirtæki að sækja sér rekstrarfé í kjölfar heimsfaraldurs kórónuveiru. Bönkunum er nú ekkert að vanbúnaði að hefja vinnu á grunni samninganna með það að markmiði að fleyta fyrirtækjum yfir erfiðasta hjallann. Þetta úrræði ætti að gefa þjóðarskútunni einhvern byr í seglin á komandi misserum.“