„Ég hef ekki verið í þessum samningaviðræðum sjálf en það hefur komið fram að krafan er um verulega tekjuskerðingu til mjög langs tíma. Það er algjörlega galin krafa að fara fram á margra ára kjarasamning með kjaraskerðingu til langs tíma við þessar aðstæður, þegar við vitum ekki hvernig fluggeirinn verður eða hvernig flugfélög koma út úr þessu yfirhöfuð,“ segir Drífa Snædal, formaður ASÍ, um stöðuna í kjaraviðræðum Flugfreyjufélags Íslands og Icelandair.

Í Morgunblaðinu í dag er haft eftir einum af stóru hluthöfum Icelandair að flugfreyjur og flugmenn félagsins verði að taka á sig 50-60% launalækkun til að forða félaginu frá gjaldþroti. Nýr kjarasamningur verði enn fremur að gilda til fimm ára og vera uppsegjanlegur af hálfu Icelandair að samningstíma loknum.

Ekki liggur fyrir nákvæmlega hvað farið er fram á mikla kjaraskerðingu hjá flugfreyjum og tókst ekki að ná sambandi við Guðlaugu Líneyju Jóhannsdóttur, formann Flugfreyjufélags Íslands, við vinnslu fréttarinnar, en stefnt er að því síðar í dag. Flugvirkjar hafa þegar undirritað kjarasamning en samkvæmt Morgunblaðinu er farið fram á 25% kjaraskerðingu hjá flugmönnum. Aðspurð hver væri afstaða ASÍ til mögulegs skammtímasamnings með kjaraskerðingu hjá flugfreyjum sagði hún:

„Við bara bökkum upp flugfreyjur og ég veit að þær hafa komið til þessa borðs mjög lausnamiðaðar og tilbúnar að ræða ýmsa fleti, en kjaraskerðing til langs tíma er útilokuð.“