Á undanförnum vikum hefur það færst í vöxt að bálfarir fari fram en duftkerin séu ekki grafin strax. Þau eru þá geymd þar til síðar þegar hægt verður að hafa fjölmennari athafnir.

Þetta kemur fram í Morgunblaðinu í dag. Haft er eftir Þórsteini Ragnarssyni, forstjóra Kirkjugarða Reykjavíkurprófastsdæma að tæplega 16% fleiri líkbrennslur hafi farið fram á fyrstu fjórum mánuðum ársins en á sama tíma í fyrra. Þá voru þær 355 en eru nú orðnar 388.

Haft er eftir Þórsteini að þetta megi rekja til breyttra aðstæðna vegna samkomubannsins. Bálförum hafi fjölgað á undanförnum árum en aukningin í ár sé ívið meiri en verið hefur. Hann segist reikna með að það dragi aðeins úr þessu þegar líður á árið eða samkomubannið verður útvíkkað.