Á miðnætti tekur gildi fyrsti áfangi í afléttingu samkomubanns. Frekari tilslakanir verða síðan kynntar fyrir lok mánaðarins. Ekki eru allir með á hreinu hvað má og hvað má ekki eftir þennan fyrsta áfanga og mikilvægt er að kynna sér breytingarnar en gerð er ítarleg grein fyrir þeim í Auglýsingu um takmörkun á samkomum vegna farsóttar, sem birt er á vef stjórnarráðs.
Hér skal tæpt á nokkrum atriðum:
Fjöldi þeirra sem mega koma saman fer úr 20 upp í 50 og skal áfram gæta þess að ekki sé minna en tveir metrar á milli einstaklinga. Verslanir mega þó hleypa inn allt að 100 manns en þurfa að gæta að sótthreinsun og fjarlægð milli fólks.
Ýmis starfsemi sem krefst snertingar verður leyfð á ný, t.d. læknisskoðanir, tannlæknaþjónusta, nuddstofur, hárgreiðsla, snyrtistofur og sjúkraþjálfun. Gæta þarf þess að tveggja metra fjarlægð sé milli viðskiptavina.
Framhaldsskólar og háskólar mega hafa opið aftur.
Skólasund verður leyft en almenningssundlaugar verða að öðru leyti lokaðar. Líkamsræktarstöðvar verða einnig lokaðar.
Æfingar og keppnir í skipulögðu íþróttastarfi eru heimilar án áhorfenda með takmörkunum:
„Í skipulögðu íþróttastarfi skulu snertingar vera óheimilar og halda skal 2 metra bili á milli einstaklinga. Notkun á sameiginlegum búnaði, einkum þeim sem snertur er með höndum, skal haldið í lágmarki og ber að sótthreinsa hann á milli notkunar.
Óheimilt er að nota búningsklefa, sturtuklefa og aðra inniaðstöðu en íþróttasal og salernisaðstöðu.
Við skipulagt íþróttastarf innandyra mega ekki fleiri en fjórir einstaklingar æfa eða leika saman í einu rými, sem skal vera a.m.k. 800 m².
Við skipulagt íþróttastarf utandyra mega ekki fleiri en sjö einstaklingar æfa eða leika saman í hópi. Séu fleiri hópar við æfingar á sama svæði skal miða við að hver hópur hafi um 2.000 m² til umráða.“
Skemmtistaðir og krár verða áfram lokaðar en veitingastaðir sem selja áfengi mega hafa opið til kl. 23 öll kvöld vikunnar.
