Sandra Líf Long sem fannst látin í fjörunni á Álftanesi þriðjudaginn 14. apríl verður jarðsungin frá Dómkirkjunni í dag. Þjóðin fylgdist í angist með leit björgunarsveita að Söndru sem hófst aðfaranótt laugardagsins 11. apríl, en ekkert hafði spurst til hennar síðan undir lok skírdags, þann 9. apríl. Bíll hennar fannst skammt frá Kasthúsastjörn laugardaginn 10. apríl.

Sandra var 26 ára gömul, fædd 2. nóvember 1993. Hún var einhleyp og barnlaus. Sandra stundaði nám í þjóðfræði við Háskóla Íslands og sinnti þjónustustörfum meðfram því. Starfaði hún meðal annars á kaffihúsi föður síns, hinum vinsæla stað, Café Mílanó. Faðir Söndru er Þórarinn Finnbogason, fæddur árið 1968, og móðir hennar er Lára Bergþóra Long, fædd 1969.

Sandra var Kópavogsbúi en eftir grunnskólapróf flutti hún með móðir sinni til Malmö í Svíþjóð þar sem hún lauk stúdentsprófi. Hún flutti aftur til Íslands árið 2017.

Í minningargrein í Morgunblaðinu í dag er vikið að því hvað Sandra Líf hafði gott lag á börnum og laðaði þau að sér, en þar skrifar Sigríður Heimisdóttir:

„Það er ótrúlega verðmætt að eiga að fólk sem elskar börnin okkar og sýnir þeim hlýju og skilning. Fáir treysta sér til að sjá um auma og skerta einstaklinga en það sýnir einstakt hjartalag og góðmennsku. Sandra vílaði ekki fyrir sér að sjá um öll börn, skert eða heilbrigð, og reyndist hún honum Baltasar mínum einstök stoð og stytta. Því gleymi ég aldrei.“

Fjölskylda Söndru þakkar Landsbjörgu, lögreglunni í Reykjavík og Hafnarfirði og öllum þeim sem tóku þátt í leitinni að Söndru. Í tilkynningu fjölskyldunnar til fjölmiðla segir: „Við höfum fundið fyrir stuðningi frá öllu landinu og þökkum fyrir blómin, kertin og fleira. Við skulum styrkja björgunarsveitirnar; við vitum aldrei hvenær við þurfum á þeim að halda.“