Að sögn ibúa á Álftarnesi (Facebook) var þyrla Landhelgisgæslunnar yfir Kasthúsatjörn í gærkvöld og tjörnin var flóðlýst. Leitin að Söndru Líf sem hófst óvænt kl. 11 í gærkvöld og stóð fram yfir miðnætti var árangurslaus.

Davíð Már Bjarnason, upplýsingafulltrúi Landsbjargar, staðfesti í samtali við DV í gærkvöld að lögregla hefði beðið um að leit yrði ræst út kl. 11 í gærkvöld. Voru sendir út nokkrir leitarflokkar frá björgunarsveitum og þyrla Landhelgisgæslunnar var á sveimi. Þá voru bátar sendir út til leitar, skv. RÚV, sem jafnframt greinir frá því að leitin hafi verið árangurslaus.

Sandra Líf Þórarinsdóttir Long er 27 ára gömul, nemi í þjóðfræði við Háskóla Íslands og þjónn. Ekkert hefur sést til hennar frá því hún fór frá heimili vinkonu sinnar um kl. 17:30 á skírdag. Bíll hennar fannst skammt frá Kasthúsastjörn á Álftanesi á laugardag.<