Aðeins 10 ný smit af COVID-19 sjúkdóminum sem kórónuveiran veldur greinstu síðasta sólarhring. Af nýjum smitum voru níu einstaklingar af þessum tíu þegar í sóttkví.

Þórólfur Guðnason, sóttvarnarlæknir, segir þetta óvenjufá smit og hægt sé að fullyrða að faraldurinn er verulega á niðurleið. Þetta megi þakka samfélagslegum aðgerðum og aðgerðum einstaklinga, fyrirtækja, félagasamtaka og stjórnvalda sem öll hafi lagst á eitt og náð þessum árangri í sameiningu.

Þó varhugavert sé að bera tölur frá Íslandi saman við tölur nágrannaþjóða, þar sem faraldurinn sé á ólíkum stöðum og ólíkar áherslur í aðgerðum þá sé samt hægt að bera saman vissa þætti. Til dæmis hver aukning hefur verið á fjölda smita á hvern íbúa en þar komi Ísland mjög vel út, betur komi aðeins út Færeyjar og Liechtenstein.

Varðandi fjölda dauðsfalla, þó því miður hafi Íslendingar misst átta einstaklinga í faraldrinum, þá séum við í ágætri stöðu samanborið við nágrannalöndin. Finnar séu þó lægri en við, og Norðmenn á svipuðum stað en í heildina sé Ísland að koma margfalt betur út en aðrar Evrópuþjóðir. Þetta gefi tilefni til að gleðjast yfir þeim árangri sem náðst hefur hér á landi.

Þórólfur minnir þó á að þrátt fyrir þessa jákvæðu þróun þá sé enn langt í land. Upp geti komið hópsýkingar og annað sem geti kynt undir faraldrinum að nýju svo samfélagslegar aðgerðir á borð við tveggja metra reglu, handþvott og spritt,  verndun áhættuhópa verði líklega aðgerðir sem verði í gangi út árið.

Samkomubannið verður svo aflétt í áföngum, þó alltaf með þeim möguleika að aðgerðir verði hertar að nýju, kalli aðstæður á það. Þórólfur hefur skilað minnisblaði með tillögu að útfærslu á afléttingu aðgerða eftir 4. maí til heilbrigðisráðherra sem mun svo væntanlega tilkynna útfærsluna á næstu dögum.