Sex einstaklingar í sjö manna fjölskyldu hafa greinst með COVID-19 sjúkdóminn. Þetta kemur fram í frétt trolli.is.
Hjónin Lilja María Norðfjörð og Sigurður Ingi Einarsson búa í Seljahverfinu ásamt þremur af fjórum börnum sínum og tveimur tengdabörnum. Þau hafa öll, nema Lilja, greinst með COVID-19.
Tengdasonur hjónanna, Arnar, fann fyrstur fyrir einkennum. Hann var slappur, með hita og niðurgang. Síðan missti hann bragðskynið og ákvað þá að fara í sýnatöku. Tengdadóttir hjónanna, Harpa, sýndi klassískari einkenni, hita, svita, mæði, verk í lungum og slappleika með niðurgang. Hún fékk hins vegar ekki að fara í sýnatöku. Harpa á systkini í áhættuhóp og þó hún búi ekki hjá tengdaforeldrum sínum að staðaldri þá treysti hún sér ekki heim til sín, ef hún skyldi vera smituð.
Synir hjónanna, Hemmi og Benóný höfðu líka báðir verið veikir.
Það var svo á mánudagskvöldi í lok mars að símtalið barst. Arnar var með COVID-19. Daginn eftir fór öll fjölskyldan í sýnatöku. Allir reyndust smitaðir nema Lilja.
„Daginn eftir tóku allir símar að hringja. Siggi með Covid-19, Harpa með Covid-19, Benóný með Covid-19 og Hemmi með Covid-19.,“ segir í frásögn fjölskyldunnar.“
Fjölskyldan segir það lán í óláni að þau eru öll í þessu saman.
„Við höfum félagsskap hvert af öðru og yngri kynslóðin hefur verið óþreytandi við að finna upp á skemmtilegum hlutum til að gera og ríkir nokkurs konar kvöldvökustemming. Það geta þó ekki allir tekið þátt, stundum er einhver einfaldlega of slappur til að treysta sér og vera með og Lilja fær ekki að vera með vegna þess að við viljum ekki að hún smitist af því að hún er að hugsa um okkur og elda handa okkur.“
Lilja sefur í sérherbergi, virðir tveggja metra regluna og er dugleg að koma ekki of nálægt hinum fjölskyldumeðlimunum.