Það ber á óþolinmæði í samfélaginu og sögusagnir grassera. „Ein er sú að við séum tilbúin með útgöngubann. Það er ekki rétt. Verum hreinskilin og gagnrýnin og þið megið gagnrýna okkur eins og þið viljið en vandið ykkur í samskiptum, vöndum orðalagið og þá mun okkar vegna betur,“ sagði Reynir Víðisson yfirlögregluþjónn á upplýsingafundi um COVID-veiruna í dag og vísaði á bug þrálátum orðrómi um að yfirvöld almannavarna undirbúi útgöngubann. Ekkert slíkt sé á döfinni.
Þórólfur Guðnason sóttvarnalæknir fór yfir nýjustu tölur um fjölda smita og sagði þróunina vera vísbendingu um að veiran sé að komast á skrið hér á landi. Þannig greindust 15% af innsendum sýnum á Veirufræðideild Landspítalans í gær jákvæð, sem er töluverð aukning. Smithlutfallið í skimun Íslenskrar erfðagreiningar er hins vegar aðeins 0,8% ennþá. Tala smitaðara er komin upp í 330. Alls 80 hafa greinst frá því í gær, sjö hjá ÍE og 73 hjá veirufræðideildinni.
„Það er tímaspursmál hvenær við sjáum mikla aukningu, við sjáum vísbendingar um það,“ sagði Þórólfur.
Nákvæma tölfræði um COVID-19 smit er að finna á vefnum covid.is.
