Mikill fjöldi greindist með kórónuveirusýkingu í gær og segir Þórólfur Guðnason sóttvarnalæknir að það gæti verið til marks um að sjúkdómurinn sé að færast í aukana. Það sé þó ekki öruggt og á eftir að skýrast betur á næstunni. Þetta kom fram á upplýsingafundi um COVID_19 í dag.
Alls eru nú 250 smit staðfest hér á landi. Hafa 6.500 sýni verið tekin. Eitt prósent í sýnatöku hjá Íslenskri erfðagreiningu sýnir merki um smit en 10% þeirra sem greindir eru hjá Veirufræðideild Landstpítalans. Mjög mörg sýni voru tekin í gær og er því ekki víst að aukning í fjölda greindra sé til marks um aukna útbreiðslu sjúkdómsins heldur gæti ástæðan verið aukin sýnataka.
Veiran hefur nú greinst í sex landshlutum og er sóttkví í öllum landshlutum. Fimm manns eru inniliggjandi á Landspítalanum með veiruna, þar af eru tveir á gjörgæslu en ekki í öndunavél.
Níu manns er batnað af veirunni. Til að uppfylla þá skilgreiningu að teljast batnað þurfa að hafa liðið minnst tvær vikur frá sýkingu og viðkomandi þarf að hafa verið einkennalaus í viku.
Þórólfur segir ólíklegt að veikjast tvisvar af veirunni og telur í raun ósannað að það geti gerst. Er gengið út frá því hér að sami einstaklingur geti ekki veikst tvisvar af veirunni.
Þórólfur benti einnig á að neikvætt próf hjá ÍE geti veitt falskt öryggi því einkennalaust fólk geti verið með veiruna án þess að greinast með hana á þeirri stundu þegar sýni er tekið.
Tæpur helmingur þeirra sem hafa greinst með veiruna voru þegar í sóttkví þegar þeir greindust. Er það talið til marks um að aðgerðir sem gripið hefur verið til hér á landi séu árangursríkar við að hefta útbreiðslu sjúkdómsins.
Nákvæm tölfæði um COVID-19 smit er að finna á vefnum covid.is.
