Í umræðunni um COVID-19 hefur ákveðin mótsögn truflað marga. Hún er sú að annars vegar eru yfirvöld að gera allt sem í þeirra valdi stendur til að hefta útbreiðslu kórónuveirunnar en hins vegar liggur fyrir að ef 60-70% landsmanna smitast af veirunni myndar samfélagið hjarðofnæmi og veiran er þar með búin að vera.
Tónlistarmaðurinn Svavar Knútur varpar fram þessari áhugaverðu spurningu á Twitter:
„Er í boði fyrir fólk sem sér ekki fram á að vinna neitt af viti næstu mánuði að fá að bjóðast til að smitast af covid19 og klára það frá í einangrun til að leggja sitt af mörkum til hjarðónæmis? Bara svona controlled burn pæling.“
DV ræddi við Þórólf Guðnason sóttvarnalækni sem segir að þetta sé frábær spurning hjá Svavari Knúti. En það sé alltaf hættuspil að sýkjast af veiru sem þessari, líka fyrir þá sem hvorki eru aldraðir né með þekkta undirliggjandi sjúkdóma. Það að smitast viljandi sé því vægt afbrigði af rússneskri rúllettu:
„Yfir 80% þeirra sem fá þessa veiru fá hana mjög vægt. Maður veit það hins vegar aldrei fyrirfram hverjir það eru. Þó að aðallega séu það eldri einstaklingar og fólk með undirliggjandi sjúkdóma sem fara verst út úr henni þá eru líka innan um einstaklingar sem myndu ekki flokkast í viðkvæma hópa sem geta farið illa. Ég get því ekki mælt með því að fólk sækist sérstaklega eftir því að fá þessa veiru. Maður veit aldrei hver útkoman verður þó að líkurnar séu manni í hag.“
„Ég held ekki með þessum aðgerðum sem við höfum gripið til að við náum hjarðónæmi,“ segir Þórólfur enn fremur. „Maður er líka að vonast til þess að með þessum aðgerðum sem verið er að beita um allan heim þá muni veiran deyja út af sjálfu sér. Það getur eitt til tvö ár að ná því. Ef veiran deyr alls staðar út og er ekki til þá er þetta allt í lagi. En ef faraldrar geisa einhvers staðar annars staðar og mjög fáir hafa sýkst hér þá getur hún komið.“
En ef hjarðónæmi drepur veiruna hvers vegna er þá verið að hefta útbreiðslu veirunnar?
„Við erum ekki endilega að segja að það sé æskilegt að 60% af þjóðinni sýkist. Við erum að segja að hjarðónæmi miðað við hegðun veirunnar muni nást við sirka 60%. Það er þannig að auðvitað er hægt að stoppa veiruna og hún deyi út þó að náist ekki þetta 60% hlutfall, það er alveg inni í dæminu og því erum við ekki endilega að sækjast eftir því. Við viljum ekki endilega fá svo mikið smit og við viljum fá hægt smit og við viljum ekki að veikasta og viðkvæmasta fólkið okkar veikist. Þannig að þetta er að minnsta kosti tvíþætt. “
Þórólfur ítrekar að við getum losnað við veiruna einhvern tíma án þess að ná hjarðónæmi. „Það væri hins vegar ekki skynsamlegt að halda veirunni algjörlega frá því hún gæti komið inn síðar og valdið faraldri. “
