Fjórir karlar hafa verið úrskurðaðir í áframhaldandi gæsluvarðhald til 10. apríl að kröfu Lögreglunnar á höfuðborgarsvæðinu í þágu rannsóknar hennar á fíkniefnamáli. Mennirnir voru handteknir í aðgerðum lögreglunnar í og við Hvalfjarðargöng í lok síðasta mánaðar, en lagt hefur verið hald á talsvert af fíkniefnum í tengslum við málið.
Um tíma sat kona einnig í gæsluvarðhaldi í þágu rannsóknarinnar, en hún er nú laus úr haldi lögreglu. Þessi kona er Jaroslava Davíðsson, ekkja Ásgeirs Þórs Davíðssonar, sem ávallt gekk undir nafninu Geiri á Goldfinger.
Í aðgerðunum voru gerð upptæk nokkur kíló af amfetamíni, sem gengur undir götuheitinu spítt. Naut lögreglan á höfuðborgarsvæðinu aðstoðar lögreglunnar á Vesturlandi auk sérsveitarinnar við aðgerðirnar, sem voru umfangsmiklar og ullu nokkrum umferðartöfum.
Rannsókn málsins miðar vel, að sögn lögreglu.
