„Þeir eru alltaf í þessum spilakössum og þarna er mikil smithætta. Ef það bætist við önnur vandamál að starfsmaður hjá mér sýkist og smiti alla þá erum við í vondum málum,“ segir íslenskur byggingarverktaki sem vill ekki láta nafns síns getið en hann er með fjölda erlendra starfsmanna í vinnu. Ásókn starfsmanna hans í spilavélar hefur lengi verið vandamál en núna er vandinn orðinn ákaflega knýjandi eftir að kórónuveiran nam land hér. Byggingaverktakinn álítur spilasalina vera gróðrarstíu smits.

„Ég var þarna um helgina og hef verið að fara um þessa spilasali og biðja fólk um að spritta þetta. En svo rakst ég á aðalmanninn þarna í gær sem átti ekki að vera þarna, má ekki spila,“ segir byggingavertakinn mjög áhyggjufullur. Hann sagði þó líka að starfsmenn spilasalarins hafi fullvissað hann um að þeir væru vandlega yfir salina og þrifu reglulega.

Að sögn viðmælanda okkar eru spilakassarnir varanlegt vandamál hjá starfsmönnum hans en þeir fara með mikla peninga í þessar vélar. „Besti starfsmaðurinn minn sem er með hæstu launin, hann spilar líka mest og er alltaf blankur,“  segir hann en maðurinn hefur reynt að aðstoða starfsmenn sína vegna spilafíknar og segir hann að þetta sé fíkn sem rústi heill og hamingju fjölskyldna.

Núna bæstist hættan á kórónuveirusmiti við og valdi sérstökum áhyggjum. „Nú ríður á að halda utan um þessa menn því það kreppir að og í kreppu þá leita menn ennþá meira í þessa spilakassa,“ segir hann og er hér augljóslega um vítahring að ræða.

„Ég er að berjast við að bjarga því sem bargað verður í þessu ástandi og þá bætist þetta álag við,“  segir maðurinn sem óttast mjög að starfsmaður hans eigi eftir að fá í sig smit af endlausu káfi á spilavélunum. Spilavélarnar séu varanlegt vandamál sem nú verður ennþá stærra vegna kórónuveirunnar.

Við greindum frá því um helgina að Samtök áhugafólks um spilafíkn og Neytendasamtökin hafa skorað á Háskóla Íslands, Happdrætti Háskóla Íslands og eigendur Íslandsspila sf, Rauða krossinn á Íslandi, Slysavarnafélagið Landsbjörg og SÁÁ að loka öllum spilakössum tímabundið vegna mögulegrar smithættu á COVID-19 og draga þar með úr smitleiðum á meðan hættuástand varir samkvæmt Embætti landlæknis.

Þetta kemur fram í yfirlýsingu frá samtökunum og þar segir einnig: „Þeim sem ætluðu að leggja þessum stofnunum og samtökum lið með spilun í spilakössum er bent á heimasíður viðkomandi varðandi reikningsnúmer.“

Meðal þeirra sem skrifa undir áskorunina eru formaður ASÍ og formaður VR, en undirritunin er svona:

F.h. Samtaka áhugafólks um spilafíkn, SÁS Alma Hafsteins, formaður

F.h. Neytendasamtakanna

Breki Karlsson, formaður

Drífa Snædal, forseti ASÍ

Ragnar Þór Ingólfsson, formaður VR