Kári Stefánsson, forstjóri Íslenskrar erfðagreiningar, hefur verið mikið í fjölmiðlum undanfarna daga vegna kórónuveirunnar en Íslensk erfðagreining hefur nú hafist handa við að skima eftir veirunni í fólki. Í færslu á Facebook-síðu sinni hrósar hann íslenskum stjórnvöldum og þá sérstaklega þremenningunum í framlínunni, þeim Þórólfi Guðnasyni sóttvarnarlækni, Ölmu Möller landlækni og Víði Reynissyni, yfirlögregluþjóni hjá ríkislögreglustjóra.
„Viðbrögð hérlendra stjórnvalda við faraldrinum hafa verið til fyrirmyndar og nákvæmlega eftir bókinni,“ segir Kári. „Alma og Þórólfur og Víðir hafa verið yfirveguð og ekki látið hávaða ýta sér út í aðgerðir sem vinna gegn því markmiði að hemja óværuna. Þau eru okkur til mikils sóma. Þau eru ekki bara flínkust heldur líka flottust og eru að leggja mikið að mörkum til þess að bjarga mannslífum.“
Kári furðar sig hins vegar á aðgerðum Dana gegn veirunni og ef marka má skrif hans hefur hann ekki mikla trú á þeim. „Þeir loka landamærum eftir að veiran hefur breiðst út í landinu. Er hugmyndin að loka veiruna inni?“ spyr Kári. „Varla, vegna þess að hún grasserar í öllum löndunum í kringum þá. Þeir eru einfaldlega að setja á svið leikþátt sem á að sannfæra fólkið í landinu um að þeir séu svo afgerandi og duglegir. Þeir ætla meira að segja að nota dáta til þess að verja landið gegn veiru sem er þegar komin þangað.“
Hann segir að það séu forréttindi að hafa þau Þórólf, Ölmu og Víði við stjórnvöllinn. „Fólk sem segir satt, er einlægt og leggst ekki svo lágt að reyna að plata. Ég tek ofan fyrir þessu fólki í auðmýkt.“
