Næstkomandi mánudag tekur gildi hér á landi fordæmalaust samkomubann og gildir í fjórar vikur. Ástæðan er eins og allir vita COVID-19.
Með samkomubanni er átt við skipulagða viðburði þar sem fleiri en 100 manns koma saman. Við öll minni mannamót þarf auk þess að tryggja að nánd milli manna sé að minnsta kosti yfir tveir metrar og að aðgengi að handþvotti og handspritti sé gott.
Bannið tekur til eftirfarandi viðburða:
Ráðstefnur, málþing, fundir og hliðstæðir viðburðir.
Skemmtanir, s.s. tónleikar, leiksýningar, bíósýningar, íþróttaviðburðir og einkasamkvæmi.
Kirkjuathafnir hvers konar, s.s. vegna útfara, giftinga, ferminga og annarra trúarsamkoma.
Grunnskólar mega hafa kennslu í skólabyggingum en tryggja þarf að ekki séu fleiri en 20 nemendur í hverri kennslustofu. Þrífa þarf og sótthreinsa skólabyggingar eftir hvern dag.
Að sama skapi mega leikskólar vera opnir ef tryggt er að börn séu í fámennum hópum. Þrífa þarf og sótthreinsa daglega.
Samkomubannið nær ekki til alþjóðaflugvalla eða alþjóðahafna, flugvéla eða skipa. Hvatt er til þess að sóttvarnaráðstafanir verði efldar og rekstraraðilar grípi til ýtrustu ráðstafana til að minnka möguleika á smiti.
Samkomubannið verður í gildi til 13. apríl
Allar nánari upplýsingar um samkomubann og annað sem tengist COVID-19 er að finna á vefnum covid.is
