Réttarhöld yfir Gunnari Jóhanni Gunnarssyni sem varð hálfbróður sínum, Gísla Þór Þórarinssyni, að bana í smábænum Mehamn í Finmörku í Norður-Noregi, þann 27. apríl 2019, hefur verið frestað. Réttarhöldin áttu að fara fram þann 23. mars en hefur verið frestað um óákveðinn tíma, líklega í sumar. Ástæða frestunarinnar er útbreiðsla kórónuveirunnar og lamandi áhrif hennar á alla starfsemi.
Gunnar hefur verið ákærður fyrir manndráp af ásetningi en hafði vonast eftir vægari ákæru, þ.e. manndráp af gáleysi. Saksóknari byggir ákæruna á því að Gunnar kom vopnaður skotvopni heim til Gísla Þórs en frá sjónarhóli verjenda er útilokað að greina ásetning í þeirri atburðarás er síðan varð er þeir bræður tókust á um vopnið en skot hljóp í læri Gísla Þórs og dó hann af blóðmissi.
Systir bræðrannar, Heiða Þórðardóttir, sagði í samtali við DV þann 22. janúar:
„Miðað við þau sönnunargögn sem lögmaður hans hefur undir höndum þá hefði ég talið öll efni til að ákæra fyrir manndráp af gáleysi. En svona er þetta og við mætum þessu af æðruleysi.“
Heiða verður viðstödd réttarhöldin og hafði gert ráðstafanir til að fara utan til Noregs fyrir 23. mars en þau áform frestast nú.
