„Staðan hérna er hræðileg,“ sagði Julia. „Við vissum öll að það væri komin veira en það var samt enginn að pæla í þessu. Enginn vissi að þetta væri orðið svo útbreitt.“ Julia fór til Mílanó til þess að stunda nám við IULM-háskólann en nú er búið að loka skólanum og er öllum ráðlagt að vera heima hjá sér fram í apríl.
„Ég fékk send skilaboð frá starfsfólki á spítala. Það hvetur fólk til að vera heima og að það eigi að taka þetta mjög alvarlega. Það er fólk á mínum aldri sem er mjög veikt núna inni á spítala. Það er ekki nógu mikið pláss fyrir alla. Starfsfólkið á spítölum er komið á þann stað að það þarf að velja hver fær að lifa og hver að deyja.“
Julia er þessa stundina í sóttkví og í viðtalinu við K100 segist hún ætla að nota tímann í að gera eitthvað uppbyggilegt. „Ég bý með stelpu og við erum að reyna að nota tímann til að gera eitthvað sem við gerum ekki venjulega. Teikna, syngja, dansa og skrifa. Við erum að reyna að vera jákvæðar og bugast ekki. Þetta verður örugglega erfitt fyrir Ítalíu að ná sér aftur en við vonum að þessi staða endi fljótlega.“
Að lokum sendir Julia skilaboð til Íslendinga. „Ég vil ráðleggja Íslendingum að vera eins mikið heima og hægt er.“
