Áslaug Arna Sigurbjörnsdóttir dómsmálaráðherra hefur skipað Sigríði Björk Guðjónsdóttur í embætti ríkislögreglustjóra frá og með 16. mars næstkomandi. Greint er frá þessu á vef stjórnarráðsins. Þar segir að hæfnisnefnd, sem skipuð var til að fara yfir og meta hæfni umsókna um embætti ríkislögreglustjóra, hafi metið Sigríði hæfasta af umsækjendum.
Frá árinu 2014 hefur Sigríður gegnt embætti lögreglustjórans á Höfuðborgarsvæðinu. Áður en Sigríður tók við embætti lögreglustjórans á Höfuðborgarsvæðinu gegndi hún embætti lögreglustjóra á Suðurnesjum, þar áður var hún aðstoðarríkislögreglustjóri frá 2007 til 2008, sýslumaður á Ísafirði 2002-2006 og skattstjóri Vestfjarða frá 1996 til 2002.
