Sigríður Björk Guðjónsdóttir var í dag skipuð í embætti ríkislögreglustjóra af Áslaugu Örnu Sigurbjörnsdóttur dómsmálaráðherra. Sigríður hefur nú opnað sig um ráðninguna og segist hún vera þakklát og hrærð fyrir traustið.

„Það er vissulega nokkuð sérstakt að taka við hlutverkinu á þeim óvissutímum sem nú ríkja. Embætti Ríkislögreglustjóra og starfsmenn þess hafa verið fremstir í flokki, með öðrum viðbragðsaðilum, við að greina, bregðast við og miðla upplýsingum um útbreiðslu og viðbrögð við kórónaveirunni síðustu daga og vikur,“ segir Sigríður í færslu á Facebook-síðu sinni.

„Fumlaus viðbrögð almannavarna hafa ekki síst stuðlað að því að róa fólk og skapa traust á getu okkar til að takast á við þetta stóra verkefni. Víða í samfélaginu fer nú fram fórnfúst starf, viðbragðsstjórnir eru myndaðar á vinnustöðum og samtakamátturinn er mikill. Fyrir alla þá fjölmörgu sem tilheyra fremstu línu viðbragða, samhæfingu almannavarna eða ýmsum mikilvægum bakvarðasveitum er gott að skynja traustið frá almenningi. Þetta hef ég fundið á mínu fólki undanfarna daga. Lögreglan á höfuðborgarsvæðinu er hluti af viðbragðsteyminu í samhæfingarmiðstöðinni og ég get fullvissað fólk um að við erum fyllilega tilbúin að takast á við hin mörgu fjölþættu verkefni sem leysa þarf á næstunni. Samhent og samstíga munum við komast í gegnum þetta.“

Sigríður segir að þó hún sé full eftirvæntingar þá sé það erfitt að yfirgefa sinn gamla vinnustað, lögregluna á höfuðborgarsvæðinu. „Það er huggun harmi gegn að starfsfólk þessara tveggja embætta vinnur náið saman í störfum sínum og enn fleiri tækifæri munu gefast til samstarfs,“ segir hún.