Guðmundur Karl Snæbjörnsson heimilislæknir telur að ekki sé gripið til nógu harðra aðgerða vegna kórónuveirunnar hérlendis.

„Ég tel bráðnauðsynlegt að við lokum fyrir samkomuhald, lokum fyrir smitleiðirnar úr skólum og innan skóla og leikskóla. Við erum að koma inn í tímabil veikinda, sem fara hægt af stað og versna núna og hjá sumum snögglega ef þetta fylgir sama munstri og um allan heim. Við erum á síðasta snúningi núna að loka á eða draga úr smitthættunni, þ.e.a.s. ef við viljum dreifa úr kúrfu sýktra og mikið veikra til að hlífa samfélaginu og heilbrigðisskerfinu frá algeru hruni. Við erum á gula stöðuljósinu núna, rétt áður en tilfelli víxlveldisaukningar fer rakleiðis upp í loftið ef við stemmum ekki stigu við þessu eins og okkur er mögulegt.“

Guðmundur segir nauðsynlegt að beita vel staðreyndum verkfærum til að hindra útbreiðslu smitsins. „Við þurfum að fletja út kúrfuna sem annars yrði ef ekki er réttum verkfærum beitt. Fletja hana út til að heilbrigðiskerfið okkar ráði eitthvað við hlutina.“

Guðmundur hefur miklar áhyggjur af því að við séum að fara inn í skarpa víxlveldisaukningu á smitum.

Hann skrifar mikið um þessi mál á Facebook-síðu sinni, sjá nánar hér.