Leikskólinn Akur í Reykjanesbæ verður í sóttkví næstu tvo daga. Er sóttkvíin vegna Nóróveiru en staðfest er að eitt barn er smitað af veirunni. Þá er einnig grunur á að annað barn sé smitað. RÚV greinir frá þessu.

Leikskólinn verður lokaður næstu tvo daga. Sigrún Gyða Matthíasdóttir, leikskólastýra á Akri, segir ákvörðunina um að loka leikskólanum hafa verið tekna í samráði við lækna og bæjaryfirvöld.

„Í ljósi aðstæðna ætluðum við ekki að taka neina sénsa á að hér fari smit að breiðast út. Það er að ganga bæði niðurgangur og uppköst í Reykjanesbæ og mörg börn hafa verið veik þannig við ætlum að loka núna og skólinn verður tekinn alveg fyrir og allir verða heima að jafna sig,“ sagði Sigrún en hún tekur einnig fram að börnin séu ekki mikið veik og að enginn hafi þurft að leggjast inn á sjúkrahús.

Leikskólinn verður hreinsaður af fagfólki á meðan hann er lokaður og eru foreldrar beðnir um að fylgjast vel með hvort einkenni Nóróveirunnar komi upp hjá börnum sínum. Einkennin eru meðal annars niðurgangur, uppköst, magapína og ógleði. Þá eru foreldrar einnig beðnir um að koma í veg fyrir að börnin hitti aðra nemendur leikskólans.