Sextíu og níu smit hafa verið staðfest hér á landi vegna kórónuveirunnar, þar af eru 15 innanlandssmit. Hátt í 600 manns eru núna í sóttkví.

Þessar nýjustu tölur um stöðuna á útbreiðslu kórónuveirunnar hér á landi komu fram á blaðamannafundi vegna veirunnar í Samhæfingarstöð almannavarna í Skógarhlíð.

Páll Matthíasson, forstjóri Landspítalans, greindi frá því að 40 starfsmenn spítalans væru í sóttkví, þar af sex í einangrun. Einn sjúlkingur lægi á spítalanum með COVID-19 en hann væri að útskrifast. Varðandi fækkun starfsfólks vegna veirunnar sagði Páll að aðgerðir væru í gangi sem myndu tryggja nægilega þjónustu og starfsemi við lífsnauðsynlegar aðgerðir, til dæmis á skurðstofum. Páll sagði jafnframt að heilsugæslur væru allar starfhæfar og þar sem smit hefðu orðið þar hefði öllum reglum verið fylgt.

Valtýr Stefán Thors barnasmitsjúkdómalæknir hrósaði íslenskum foreldrum fyrir yfirvegun og hvað þeir fylgdu öllum reglum vel. Mikilvægt væri að ræða um veiruna við börn á því stigi sem börnin skildu og gera þeim ljóst að ekki væri ástæða til að vera óttasleginn.

Víðir Reynisson, yfirlögregluþjónn hjá Ríkislögeglustjóra, sagði að eitt þriðja stigs smit væri komið fram. Það tengist ekki smituðum nemanda við MH.