Mercedes Benz Sprinter-bifreið sendibílstjórans Jónasar Antonssonar var stolið í Mosfellsbæ, aðfaranótt mánudagsins 2. mars síðastliðins.

Í viðtali við DV segir Jónas að ránið hafi að öllum líkindum verið ansi erfitt, þar sem að lyklum að bílnum var ekki stolið. Því hafi bílnum þá annaðhvort verið komið í gang með óviðurkenndri aðferð, eða dreginn burt af stærri bíl. Seinni kosturinn ætti ekki að vera einfaldur en Benz-bifreið Jónasar er ansi stór, eða átta metrar á lengd, að mati Jónasar.

Líklega eru einhverskonar glæpagengi á bak við svona rán að mati Jónasar. Hann telur líklegt að bíllinn verði bútaður í sundur og seldur í varahlutum, líklega erlendis.

„Þetta hljóta að vera einhver gengi sem eru að þessu, þetta er alveg stórskrýtið “

Jónas er ósáttur með störf lögreglunnar, sem honum finnst ekki hafa staðið í sínu. Hann segir að það hafi tekið hann heila viku að ná í þann sem hefði umsjón með málinu og að myndavélar sem gætu gefið vísbendingar um staðsetningu bílsins hefðu ekki verið skoðaðar.

Bíllinn var nánast ókeyrður segir Jónas og segir að hann fái tjónið aldrei fyllilega bætt þrátt fyrir að vera tryggður.

Hundrað þúsund króna fundarlaun verða gefin þeim sem finna, eða geta bent á bílinn, sem er líkt og áður segir af gerðinni Mercedes Benz Sprinter. Bíllinn ber númerið ZM-Y30 og er hvítur að lit.