Jóhannes Björn Lúðvíksson, höfundur bókarinnar Falið Vald og samfélagsrýnir, segir að COVID-19 hefði varla getað komið á verri tíma. Hann segir kreppu á heimsvísu nú staðreynd. Á Facebook skrifar Jóhannes:

„Kórónuvírusinn, Corvid-19, hefði ekki getað komið á verra augnabliki. Síðan hagkerfi heimsins hrundi 2008 hefur mesta skuldasöfnun seinni tíma rétt haldið í horfinu. Hagkerfi heimsins framleiðir vörur og þjónustu upp á 85 trilljónir dollara (evrópskar billjónir) en skuldirnar í kerfinu hljóða upp á 225 trilljónir dollara. Þetta skuldahlutfall á sér enga hliðstæðu og það þolir enga “svarta svani” eða óvænt áföll.“

Jóhannes segir fjárfestingabólu í Kína sem sé að springa. „Í Kína, þar sem vírusinn er á góðri leið með að slátra hagkerfinu, eru útistandandi skuldir í kerfinu upp á 40 trilljónir dollara. Það hrikalegasta er að Kínverjar fjárfesta mest í steinsteypu — í draugaborgum þar sem fáir eða enginn býr — en um 80% þess sem almenningur hefur sparað hefur runnið til fasteignakaupa (margfalt hærra hlutfall en á Vesturlöndum). Þetta er ein rosalegasta fjárfestingabóla allra tíma. En kínverska fasteignaævintýrinu er lokið — og það satt að segja stóð miklu lengur en flest hagfræðilíkön reiknuðu með. Kínverska skuggabankakerfið nálgast gjaldþrot og fasteignaverðið hrynur með í fallinu,“ segir Jóhannes.

Hann segir að hagstjórn síðustu ára hafi einungis skilað sér í auknum tekjum þeirra ríkustu. „Það sorglegasta við hagstjórn seinni ára er að peningaaustur seðlabanka heimsins, ásamt gjafavöxtum og neikvæðum vöxtum, hefur nær eingöngu skilað sér í auknum tekjum ríkasta fólks jarðarinnar. Þessa stundina á 1% jarðarbúa meira en 40% allra hlutabréfa. Örfáir einstaklingar luma á meiri eignum heldur en helmingur jarðarbúa. Þessa dagana erum við að horfa upp á hvernig óvæntir utanaðkomandi atburðir geta látið þessa fáránlegu spilaborg hrynja,“ segir Jóhannes Björn.