Persónuvernd og Vísindasiðanefnd hafa gefið út sameiginlega fréttatilkynningu þess efnis að fyrirhuguð skimum ÍE fyrir kórónuveirunni sé ekki leyfisskyld og geti því farið fram. Virðist misskilnings hafa gætt um málið en fyrri svör nefndanna um að skimunin væri vísindarannsókn og þyrfti að afla leyfis fyrir henni vakti þau viðrbögð ÍE að hætta við áformin. Fréttatilkynningin er eftirfarandi:
Að gefnu tilefni vilja Vísindasiðanefnd og Persónuvernd koma eftirfarandi upplýsingum á framfæri.
Persónuvernd barst síðdegis í gær, laugardag, erindi frá Íslenskri erfðagreiningu þar sem fram kom að fyrirtækið hefði boðist til þess að aðstoða heilbrigðiskerfið við að öðlast betri skilning á því hvernig Covid19-veiran hagar sér.
Út frá efni erindisins vöknuðu spurningar um hvort hluti verkefnisins fæli í sér vísindarannsókn á heilbrigðissviði sem væri leyfisskyld hjá Vísindasiðanefnd. Var Íslensk erfðagreining upplýst um það og boðin flýtimeðferð.
Samkvæmt þeim upplýsingum sem nú liggja fyrir er ætlun fyrirtækisins að skima fyrir Covid19-veirunni og skoða veiruna nánar. Slík skimun og veirurannsókn er hvorki leyfisskyld hjá Vísindasiðanefnd né Persónuvernd og getur því farið fram án aðkomu þessara aðila.
