Gilbert Khoo, sem sakfelldur var fyrir stórfellt smygl í Bretlandi fyrr á árinu, fékk skilorðsbundinn fangelsisdóm vegna aldurs síns og undirliggjandi sjúkóma sem gera hann útsettan fyrir COVID-19 sjúkdómum. Dómurinn var kveðinn upp síðastliðinn föstudag. Þetta kemur fram í samantekt Daily Mail um áhrif kórónuveirunnar á fangelsismál og dóma í Bretlandi. Segir að útbreiðsla veirunnar gæti orðið til þess að hættulegir glæpamenn yrðu látnir lausir.
Gilbert getur þó vart flokkast undir hættulega glæpamenn. Hann var fundinn sekur um smygl á ungálum í útrýmingarhættu, að verðmæti hátt í andvirði 900 milljóna íslenskra króna. Í dómnum var honum álasað fyrir að hafa með þessum hætti unnið skaða á dýrategund í útrýmingarhættu til þess eins að hagnast fjárhagslega, en ungáll er mjög eftirsótt vara í Asíu.
Gilbert, sem er fæddur og uppalinn í Malasíu, var þekktur og umsvifamikill veitingamaður á Íslandi síðustu tvo áratugi síðustu aldar. Líklega er hann þekktastur fyrir rekstur veitingastaðanna Sjanghæ og Asíu við Laugaveg en hann átti marga fleiri, meðal annars stofnaði hann skyndibitastaðinn Bamboo í Mjóddinni. Má fullyrða að Gilbert hafi átt stóran þátt í að Íslendingar kynntust asískri matargerð. Undanfarin ár hefur Gilbert verið búsettur í Bretlandi og starfað sem fisksali.
Meðfylgjandi er mynd og myndatexti úr tímaritinu Frjáls verslun úr kynningu á veitingastaðnum Sjanghæ. Fréttir og kynningar á starfsemi Gilberts hér á landi voru algengar á níunda og tíunda áratug síðustu aldar.
Þess má geta að Gilbert er enn með íslenska kennitölu. Í þjóðskrá er hann skráður til heimilis í Bretlandi. Hann heitir fullu nafni Gilbert Yokpeck Khoo.
